ФАРИШТАГИНАМ
Мен учун ғам ютдинг, кўзларингда нам,
Не дарддан кўзларинг маюс бунча хам,
Бахтнинг саройига бирга борамиз,
Йиғлама, ўзимнинг фариштагинам.
Ҳаёт кўчасида адашдим билмай,
Сенинг соф севгингни кўзларим кўрмай,
Айтгин, гуноҳимни мен қандай ювай,
Йиғлама, ўзимнинг фариштагинам.
Ношудман, қадрингни билмадим кечир,
Ҳолинг не деб бир бор сўрмадим кечир,
Олддан оққан сувни кўрмадим кечир,
Йиғлама, ўзимнинг фариштагинам.
Дардларим айтмоққа сўзлар етмайди,
Сени ўйламай бир оним ўтмайди,
Йиғласанг, кўнглимдан ҳасрат кетмайди,
Йиғлама, ўзимнинг фариштагинам.
Жондан кечганимдир, сендан кечганим,
Ёдимда севгимга қасам ичганим,
Етар, ўзи менинг йиғлаганларим,
Йиғлама, ўзимнинг фариштагинам.
Сендан олисларда бўлдим не бўлсам,
Сени йиғлатгунча бўлмасми ўлсам,
Бир умр бағрингни бахтга тўлдирсам,
Йиғлама, ўзимнинг фариштагинам.
Ахад Қаюм
21.01.2010 й.
|