АГАР ЭРИНГ СЕНГА ХИЁНАТ ҚИЛСА...

Қизойим, рўзғорингда фалокат юз берди: жуфтинг сенга хиёнат қилди! Қандай ўйлайсан, нега шундай бўлди? Осмонга сакрашдан бурун обдон тафтиш қил!Ё тилинг ёмон, ё саришта эмассан, ё татимли овқат қилишни билмайсан! Шунақалигинг рост бўлса, сендан кўнгил қолиши табиий, чунки бундай хонадонда роҳат бўлмайди, қизим!

Рўзгор - энг қалтис жой! Айниқса, тилингга эҳтиёт бўл! Эру аёлнинг умр йўлдошидан яширин бир сири бўлиши шарт: жуфтингга уни ғоят севишингни, усиз яшай олмаслигингни изҳор қилган заҳотинг унинг учун қизигғинг қолмайди, шуни ёдда тут!

Жуфтинг ҳиёнат қилди дейлик. Шу кунгача рисоладагидай эди, бу вазият ногаҳонда юз берди. Бу ҳолатда сен уни дарҳол ер билан бир қилма! Эркакнинг заифлиги - ғоят самимийлигида! Шунинг учун таъсирга тез берилади. У кимгадир илакишиб қолган бўлса, сендан кунгли қолгани учун эмас, ташқи таъсиринг ўткирлиги учун ҳам бўлиши мумкин.

Аёл зотининг айнишидан худо сақласин! Чунки у айниқса, жуфтидан кўнгли совиб, ё мўлжаллагаи одамига ишқи тушиб, режа билан, астойдил айнийди! Вақт ўтиши билан ҳам шу режасида қатьий туравериши мумкин. Бу ҳақиқий хатар! Шунинг учун ҳам хиёнаткор аёл кечирилмайди!

Аммо эркак таъсирга берилганда, таҳлилни йўкотади, шайтонга тез қул бўлади. У гоҳо таъсирга қандай тез берилган бўлса, шундай тез қайтиши ҳам мумкин. Ўзига келгач, қилган ишидан астойдил афсусланиши, юракдан чиқариб тавба қилиши мумкин. Мана шу ўзи сенинг ҳеч нарса йўқотмаганинг эмасми? Сабр даркор.

Жуфтинг хато қилади, сен бу ҳолатга унинг дўсти сифатида баҳо бер ва дўстнинг ишини қил. У адашди, дўст дўсти адашганда кунига ярасагина бурчини бажарган бўлади. Қолаверса, унинг уйдан безишига ўзингнинг ҳам хиссанг бор! Ҳозир сенинг вазифанг қўлингта рўмолча олиб йиғлаб ўтириш эмас, қандай қилиб бўлса ҳам, уни хатодан қайтаришдир.

Рўзғорчилик беорчиликдир, қизим, турмуш кечиримлилик бор жойда турмуш бўлади!

Дейлик рўзгордошинг сендан кетиб боряпти. Шуни билки, сен хўмраяверсанг, жанжал ясайверсанг, "топганинг мендан аъло бўлибдими?" деб ёқасига осилаверсанг, унинг сендан узоқашиши тезлашади!

Сендан узоқлашган эркакни қўрқитиш, аризабозлик эл ўртасида шарманда қилиш билан қайтариб бўлмайди! Бу ишлар унга ҳаддан зиёд оғриқ беради ва бу оғриқларни сен ташкил қилаётганинг учун, унга янада хунукроқ кўринасан. Қарабсанки, у нариги томонга аввалгидан бадтарроқ интила бошлайди.

Ҳалиги аёл эса бундай пайтда янада халимроқ бўлиб олади. Ҳамма ёқдан урилиб-сурилган эркакка у халоскор бўлиб туйилади ва унинг тадбиркорлик билан кўрсатган "меҳрибончилиги"дан паноҳ топади. Мана, қизим-жоним, жанжал-сурон билан эришганинг шу бўлди: ўз қўлинг билан уларни янада яқинлаштириб кўйдинг! Бу ҳам етмагандай, ўртага тушиб шарманда бўлдинг!

Болажон, бундай пайтда ўзингни кўриб кўрмаганга, сезиб сезмаганга ол. Индамай хонадонингни обод қилавер, шу кунгача бепарво бўлган тутумингни зимдан яхшила, эпчил аёллардан аёллик санъатини урган! Яъни кийиниш, овқат қилишдаги носозликларни ва ҳ.к.

 "Бир этак болали бўлсам, уйда фалонча юмуш менга қараб турган бўлса, бир эрга ёқиш учун, ойнакка қараб бежанишим, уйимни ясатиб ўйнашим бачканалик эмасми?" - дема!

Жуфтинг - сенга Оллоҳ берган муқаддас мулкинг. Мулкингга эса ўғри тушиб турибди! Эҳгиётингни қиласан-да! Агар у йўқолиб қолса, қўл силтаб қолавермайсан-ку! Зоҳирингда қўл силтасанг ҳам, ичингда куйиб куллар бўласан-ку! Демак, ўзингни асраш учун ҳам, жуфтингни бой бермаслигинг керак!

Аммо ҳаргиз эркагингнинг келиш-кетишини суриштирма, ўзингни унинг қаерда юриши билан қизиқмаётгандай кўрсат. Йўқолиб кетиб, яна пайдо бўлса ҳам, "қаерда эдингиз?" дема! Боягидай олдига чойини, нонини қўйиб, кир кўйлагини тозасига алмаштириб қўявер. Қовоғингни уйма. Аммо очилиб-сочилиб ҳам муомала қилма. Фақат саволигагина жавоб бер. Эринг майда гапроқ бўлса, нега қизиқмаётганинг билан қизиқиши мумкин. Шунда: "Кўчада бизнинг зиёнимизга иш қилармидингиз, эсон-омон кириб келдингиз, шу кифоя!" - қабилида сўппайтириб жавоб қилиб қўй. Аммо тазаксиз айт!

Ўзинг эса кўчага атаган чиройли кийимларингни кийиб, ўсма- сурмангни қуюқ қилиб юрган бўлгин! Ана ўшанда унинг миясига ток уради. Юрагига ғашлик тушади, "нега мен билан қизиқмаяпти, очилиб кетганини қаранг бунинг, мени олдингидай қизгонмаяпти ҳам, бу юришида бировга кўнгли тушиб қолган бўлса-я", деган ваҳима пайдо бўлади. Қандай қилиб бўлса ҳам, унинг юрагига шу ваҳимани солиш керак! Натижасини ўшанда кўрасан!

Ўрни келганда мағрур бўла билиш ҳам илм! Сенга хиёнат қилган эркагингга ялинма, илтижо қилма! Мағрур бўл, аммо унинг кўнгли қоладиган иш қилма. Сабр қил, бугун бўлмаса эргага сени унга солиштиради. Ўшанда сенинг фазилатларинг устун келгудай бўлсин. Никоҳнинг оҳанфабоси, кўз очиб кўрган рўзгорнинг меҳри ўлмайдиган нарса, бир куни жуфтинг остонангга зор бўлиб қайтиб келади. Халқнинг "кел-кел деса келмайди, келма деса келади" нақли рўзғорга ҳам тааллуқли! Сабр қил!

Турсуной опанинг "Ўғлим сенга айтаман" китобидан олинди